Mannan vahkku neahttaáviisa čálii ođđa luoddačuovggaid birra mat leat biddjon bajás Idrettsveienis. Dát lea šaddan earenoamáš buorre ja diehttelas lea buoridan johtolatdorvvolašvuođa olu. Seammás go ođđa luoddačuovggat biddjojit bajás ovtta sajis de váilot čuovggat eará sajis Siellagis. Kjetil Kverneland-Hognestad buktá vuohon ovdan sávaldaga oaččut čuovggaid luotta mielde bajás Bádje Siellagii. Muhto su sávaldat ii boađe ollašuhttot boahtte jagi dahje jagi das maŋŋel.

- Eai leat plánas

Hoavda teknihkkalaš ossodagas Siellaga suohkanis, Reidar Berg lohka neahttaáviisii ahte eai leat plánejuvvon luoddačuovggat bajás Bádje Siellagii boahtte jagi dahje jagi das maŋŋel. – Mii eat leat várren ruđaid dasa boahtte jagi investerenbušehttii. Lea oalle haddi bidjat bajás ovtta ođđa čuovgaája ja maiddai lea divrras bajásdoallat dán. Muhto mun ávččuhan ássit váldit oktavuođa sátnejođiheaddjin dán ášši oktavuođas, lohka Reidar Berg.

Hilgot ovddasvástádusa

Suohkana ja teknihkalaš hoavdda vástádus ii hirpmástuhtte Kverneland-Hongestad oppanassiige. – Ii maid dasa galgá lohkat. Leat máŋgii buktán ovdan dán ášši, ja juohke háve sii hilgot ovddasvástádusa. Sihke dan ahte eai leat čuovggat ja maiddai leahttu maid muhtin biilavuoddjit oaivvildit lea dohkálaš luottas mas galgá doalahit 30 km/t. Dát, oktan dainna ahte lea bihkkaseavdnjat de mii dušše vuordit goas de dahpahuvvo lihkohisvuohta. Mu mielas livččii áigi ahte válddáše dán duođalaččat, OVDAL go dahpahuvvo lihkohisvuohta. Mii orrut oalle stuora ásodatbáikkis mas lea olu johtolat, lohka Kjetil Kverneland-Hognestad neahttaáviisii.