Salangen-Nyheter

Váldosárdnideaddji UNICEF konferánsas:

Eallin autisman

Jon Henrik Larsen oaivvilda ahte Salangen-Nyheter ii livččii gávdnon jus sus ii livččii leamaš diagnosa autisma. GOVVA: CAMILLA FINVIK

VUOTNASIIDA: Neahttaáviisa iežas doaimmahushoavda, 28 jahkásaš Jon Henrik Larsen, galgá leahkit váldosárdnideaddji UNICEF konferánsas Oslos 30.beaivvi miessemánus. Konferánsa namma lea “The State of the World’s Children 2013: Children with disabilities”.

Salangen-Nyheter
Nye Salangen-Nyheter AS

Publisert:

Annonse

Salangen-Nyheter lea unna neahttaáviisa mii lea báikkáiduvvon Vuotnasiidas Siellaga suohkanis. Lassin dasa ahte gokčat lagamus birrasa ođđasiid, leat neahttaáviisas Web-TV sáddagat eará gielain. Neahttaáviisa lea máŋgii ožžon ávvira riikamediain Norggas. Salangen-Nyheter namuhuvvui maŋimuččat “Nytt på Nytt”-nammasaš humorprográmmas NRK1 ja radioprográmmas “Verdens Rikeste Land” NRK P3 go ledje čállán ášši gávppašanvovnna birra mii lei oidnon márkanis. – Mun álggahin neahttaáviisa áibbas okto. Mun lean dagahan autisma iežan gievravuohtan, ja Salangen-Nyheter láhčet bálgá earáide suohkanis geat leat doaibmahehttejuvvon. Mis leat ovdamearkadihtti golbma bargi geain lea autisma, lohka son.

Iežas diagnosa

UNICEFa konferánsa lágiduvvo oaivegávpogis loahpas dán mánus. Miellahtut sihke ráđđehusas ja gonagasbearrašis bohtet oassálastit. Jon Henrik Larsen lea máŋgii leamaš medias ja muitalan olbmuide movt lea eallit diagnosain autisma. – Dát lea hui gelddolaš. Mun illudan beassat muitalit iežan eallima ja diagnosa birra. Dát lea stuora gutniin ja vejolašvuohtan munnje, muitala Larsen iežas neahttaáviisii.

Ovdagovvan

Jon Henrik muitala viidásit ahte su mielas lea dehálaš muitalit movt sáhttá jorgalit juoga mii lea jurddašuvvon hearkivuohtan juoga buorrin ja gievravuohtan. Son maid muitala ahte sus lea stuorra áktejupmi dan barggu ovddas maid UNICEF bargá. Larsen galgá doallat sártni olbmuide geain lea mearkkašupmi ja vejolašvuohta dadjat juoga dan birra ahte movt mánáin ja nuorain sáhttá leahkit eambbo árvvolaš eallin. – Lea stuora illu munnje beassat doallat sártni konferánsas gos ulbmil lea loktet ja buktit oidnosii mánáid geat leat doaibmahehttejuvvon.  Lea buorre dovdu jurddašit ahte sáhtán leahkit ovdagovvan earáide, muitala Larsen.

Ruovttoluotta TV2ai

Disdaga ovdalgaskabeaivvi Larsen oaččui telefuvnna “God Morgen Norge” prográmmas mii oidno TV2as. Sii háliidedje ahte Siellalaš gálga boahtit sin luhtte fitnat ovdal konferánsa. – Lea hui somá ahte sáhtán čuvget daid váttisvuođaid iešguđet ládje. Stuorimus hástalus lea movt sáhttá šaddat čeahpibu čuovvolit máná gii lea doaibmahehttejuvvon mánnávuođas bargoeallimii.  Lea dehálaš gaskkustit ahte lea vejolaš lihkostuvvat, loahpaha son. Jon Henrik lea mielde “God Morgen Norge” prográmmas duorastaga 30.beaivve miessemánus diibmu 07.40.