Márkomeannu festiválajođiheaddji Runar Myrnes Balto álmmuhii mannan duorastaga festivála stivrra ja bargiid bealis ahte eai lágit Márkomeannu-festivála boahtte jahkái, 2014. Ákkat leat hástilahtti ekonomalaš dilli ja dárbu árvvoštallat organiserema. Sis ii leat doarvái buorre ekonomiija ahte nagodit doalahit ja bálkáhit produseantavirggi, mii lea áidna virgi festiválas mii bálkáhuvvo muhto mii seammás lea deháleamos. Sii leat ožžon olu doarjaga ja ipmárdusa ahte ferte šaddat ná, muhto áŋke lohket olbmot ahte lea váivi go ii šatta festivála boahtte geasi.

Mearrádus doalahuvvo

Myrnes Balto muitala neahttaaviisii ahte Márkomeannu lea boahtán dakkár dillái gos eai leat ekonomalaš resursat eai ge olmmošlaš návccat lágidit stuorra doalu seamma leavttu mielde go sii leat daid maŋimuš jagiid.  – Dán dihti mii leat stivrra bealis nevvon searvái ahte eai lágit boahtte jagi festivála, ja baicce geavahit áiggi digaštallat makkár hámis mii háliidit Márkomeanu kultuvrralágideaddjin boahtteáiggis oaidnit, lohka Myrnes Balto. Son seammás lohka ahte sii sávvet ahte Márkomeannus searvvis galgá leat seamma doaibma go dal maiddai boahtte jagi, muhto lea unnán mii čujuha dasa ahte galgá lágiduvvot dábálaš Márkomeannu festivála geasset ja ahte mearrádus dasa boahtá doalahuvvot.

Eará doalut

Seammás Myrnes Balto muitala ahte sii háliidit lágidit iešguđetlágan kultuvrralaš doaluid 2014 čađa, jus sidjiide addojuvvo vejolašvuođa joatkit bistevaš ruhtadeapmi Sámedikki bušeahtas. Festivála lea maŋemuš jagiid sturron ja lea šaddan váttis hálddašit doaluid nu movt dál leat. – Váikko leat maŋimuš jagiid boahtán ođđa eaktodáhtolaš bargiid organisašuvdnii, de sáhttá dadjat festivála sturrodaga lea šaddan váttisin bargojovkui hálddašit. Dát lea hástalus maid mii fertet boahtte jagi geavahit čoavdit, dadjá Myrnes Balto.

Ii guoskka dán jahkái

Mearrádus ahte ii lágit festivála boahtte jagi ii guoskka dán geasi festiválii oba ge. – Mun háliidan deattuhit mo mii illudit dán geasi festiválii. Dáđi eambbo olbmot bohtet dán jagi festiválii dađi buorebut ekonomalaččat, lohka Myrnes Balto neahttaáviisii. Son oaivvilda ahte  Márkomeanus lea hui gelddolaš prográmma dán jagi, ja sii buohkat vurdet Márkomeannu-dovddu guossin. – Ieš mun illudan hui oaidnit Sameblod, mii lea joavku ruoŧabeale eret, loahpaha festiválajođiheaddji moddjái.

Dán jagaš Márkomeannu lágiduvvo suoidnemánu 25.–27 .beaivái. Artisttat mat earet eará bohtet leat Mari Boine, Niko Valkeapää ja Sameblod.