NSR parlamentáralaš jođiheaddji ja presideantaevttohas Aili Keskitalo lohka neahttaáviisii ahte sii leat hui ilus go leat nagodan oažžut posišuvnna ja Olgešbellodaga bušeahttasoabaheapmái, mat dál dorjot sin evttohusa juolludit eambbo doaibmadoarjaga giellaguovddážiidda. Lei diibmá ahte giellaguovddažat evaluerejuvvo ja bohtosat dás čájehedje ahte sii leat meinnestuvvan bures bargguin maid sii leat bargan ja ahte sii doibmet hui bures. – Mun doaivvun ahte dát lea leamašan mielde rievdadit oainnu olusin giellaguovddažiid birra ja ahte dan dihti mii leat dál nagodan lasihit doarjaga sidjiide, lohka Keskitalo.

Stuorámus vuoitit

Maŋŋel Sámedikki reviderejuvvon bušeahta lávdegoddemeannudeami lea dahkkojuvvon bušeahttasoabaheapmi gos earret eará giellaguovddážat leat stuorámus vuoitit go ožžot lassi juolludemiid oktiibuot 2 milliuvnna ovddas. Nu go dál lea evttohuvvon, de oažžu guhtege giellaguovddáš 150 000 ruvnno lassi doaibmadoarjaga. - Dát lea illubeaivi sámepolitihkas. Viimmat leat ožžon doarjaga dasa ahte giellaguovddážat galget oažžut lassi doaibmadoarjaga. Dán ovddas mii leat guhká bargan, ja maŋemustá 2012 skábmamánu bušeahttagieđahallamis. Dalle eat ožžon doarjaga, ja danne lea ge erenoamáš illudahtti go dál leat nagodan dan, lohká hui duhtavaš presideantaevttohas.

Dehálaš ášši

Son čujuha dasa ahte giellaguovddážat leat leamaš dehálaš áššin NSR:ii čađat áigge. – Leimmet mii geat álgoálggos oaččuimet giellaguovddážiid mielde bušehttii, ja buot bohtosat maid sii olahit duođaštit ahte lei rievttes vuoruheapmi dalle. Sávvamis dál bohtet vel eambbo giellaguovddaža  go dál mii nannet fas giellabarggu buot sámi guovlluin, loahpaha Keskitalo.