Dán jágii lea Romssa regiovdna gii lea doallogoddi dán jágii riikačoahkkimii ja lea nu ahte buot duodjeregiovnnat leat gálgan leamen geargan lágidit iežaset jahkečoahkkimiid ovdal riikačoahkkima. Jahkečoahkkimiid beavdegirjjit oktan dárkkistuvvon rehketdoaluin, jahkečoahkkimiid áššelisttut ja listu válljejuvvon sáttagiid badjel gálga sáddejuvvot čállingoddái ovdal riikačoahkkima.

Čájáhus sámi designas

Go riikačoahkkin lágiduvvo de háliida Romssa Sámiid Duodji oktan Duodjeinstituhtain bidjat čoahkkái čájáhusa sámi designas ja dainna lágiin addit vejolašvuođa sidjiide geat servet dasa vuovdit iežas duojit.

- Leat earenoamážit duojárat Romssa- ja Davvi-Nordlándda fylkkain gean mii háliidit bovdet searvat, lohka Biret Oskal Eira neahttaaviisii. Riikačoahkkin gálga leahkit Scandic hoteallas Romssas ja čájálmas sámi designas boahtá dáhpáhuvvot go lea almmolaš ráhppan riikačoahkkimis 20.beaivve cuoŋománus. Vuovdin boahtá leahkit rabas olles riikačoahkkima vuolde.

Márkanastit duoji

- Ulbmil dain doaluin lea ahte duojárat galget beassat čájehit iežas duojit ja dáinna lágiin márkanastit duoji, lohka Oskal Eira. Son ávžžuha sin geat háliidit searvat, dieđihit iežas ovdal 2.beaivve cuoŋománus. Romsa Sámiid Duodji boahtá gokčat visot goluid ieš čájálmasa ovddas, muhto ii gal duojára mátke- ja orrungoluid. Jus don háliidat searvat iežat dujiin čájálmassii ođđa designii de fertet sáddet gova alcces, iežas buvttadeamis ja čállit veaháš daid birra go lea jurddašuvvon ráhkaduvvot kataloga čájálmassii.

– Háliidan maid deattuhit ahte riikačoahkkin lea rabas buot miellahtuide ja muđui earáide geas lea beroštupmi sámi duojis, loahpaha Oskal Eira.

Jearaldagat?

Dá leat geainna sáhtát váldit oktavuođa jus leat jearaldagat:

Oddveig Nymo Dalbakk, tlf. 990 12 909, e-boasta: ny-dal@hlkbb.no

Berit Oskal Eira, tlf. 905 65 417, e-boasta: beritoskaleira@gmail.com.

Tove Kvernmo Gaup, tlf.48058363, e-boasta: tovegaup@hotmail.com