Salangen-Nyheter

Bartahuksen Geađgebatjávrris:

Mearrádus gárvvis

Dál lea lohpi bidjat bájas guhtta ođđa barta Geađgebatjávrri láhka Siellaga suohkanis.

Dál lea lohpi bidjat bájas guhtta ođđa barta Geađgebatjávrri láhka Siellaga suohkanis.

VUOTNASIIDA: Birasgáhttendepartemeanta šattai loahpalaččat váldit mearrádusa. Álggos ledje 45 barta ja dát unniduvvui 15 barttaide. Dál lea mearriduvvon ahte lea dušše lohpi bidjat bájas guhtta ođđa barta Geađgebatjávrri láhka Siellaga suohkanis.

Salangen-Nyheter
Nye Salangen-Nyheter AS

Publisert:

Annonse
Annonse

Lea Birasgáhttendepartemeanta gii lea meannudan ášši ja mearridan movt šaddá loahpalaččat. Ášši lea beaggán máŋga jágii gos Siellaga suohkan álggos rievdadii logu barttain maid eanaeaiggádat ledje háliidan, 45 bartas 15 barttaide. Muhto lei nu ahte maiddai daid 15 barttaide bohte váidalusat, sihke Romssa fylkkamannis, Sámedikkis ja Guovllustivra Romssa guođohanguovllus (Områdestyret for Troms beiteområde). Mearrádus departemeantas lea beallemuttus dohkkeheapmi regulerenplánas maid Siellaga suohkanstivra dohkkehedje 15 bartasajiin. Buot bartasajit leat áddjojuvvon huksenlobi oarjjadavabeal Geađgebatjávrri ja go otne leat jo ovcci barta dán guovllus de addojuvvo lohppii guhtta ođđa barttaide.


Váikkuha orohaga

Stállonjárgga orohat lea boazodoaloorohat masa dát mearadus čuohcá garrasit. – Mii leat hui behtohallan mearrádusa badjel ja leimmet doivon ahte galggaimet oaččut doarjaga vuosteákkas. Mii leat hui hirpmástuvvan ahte ná šattai, lohka Helge Oskal Stállonjárgga orohagas neahttaaviisii. Son maid muitala ahte dát boahtá váikkuhit sin johtingeainnu ja ahte justte dát guovlu Geađgebatjávrri birra lea gasku sin orohagas. Dát bartaguovlu boahtá juohkit sin orohaga guovtti sadjái ja dát dagaha ahte boazu ii beasa guođohit ja johttit nu movt ieš háliida. – Dát mii lea buot vearrámus lea ahte dát guovlu lea guottetbaiki. Giđđat álgá guottet ja de lea dehálaš ahte njiŋŋelasat besset ráfis leat sihke ovdal ja maŋŋel guotteha. Lea hui dehálaš ahte áldu beassá ráfis dikšut miesis. Jus ovdamearkka vurjojuvvojit olbmuid, vuojániid dahje meahcceelliid dihte de sáhttá áldu guođđit miesis. Jus šaddá nu ahte áldu ii guotte ja massit miesit de sáhttá dát oaččut stuora váikkuhusaid min ealáhussii, lohka Oskal.

Dovdá vuosttaldeami

Oskal ballá ahte go leat álggos addán lobi hukset barttaid dán guvlui mii lea luonddugáhttenguovllus, de lea álkibut dohkkejit ja addit lobi vel eambbo huksemiidda. De šaddá vel stuorat váikkuhus sin orohahkii. – Lea buot eanemus váidalahtti ahte dát dohkkehuvvo Eanandoallo- ja biebmodepartemeantas. Sii han máhkaš galget doarjut boazodoalu, muhto dál han čájehuvvo ahte sii han baicca barget min vuosttá, Oskal loahpaha.

Birasgáhttendepartemeanta čállá sin áššemeannudeamis ahte sii ipmirdit boazodoalu oainnuid áššái ja ahte eambbo doaibma dán guovllus boahtá čuohcat Stállonjárgga orohahkii. Johtingeaidnu lea lulábealde Geađgebatjávrri ja ollašupmi dáid plánain mielddisbuktá ahte orohat juhkkojuvvo guovtti saddjái ja dáinnalágiin unnu.

Olles mearrádus

Dás gávnnat Birasgáhttendepartemeanta mearrádusa ollislaččat: http://www.regjeringen.no/nb/dep/md/tema/planlegging_plan-_og_bygningsloven/kommuneplanlegging/innsigelsessaker/2013/salangen-kommune---innsigelse-til-regule.html?id=714618

Annonse