Salangen-Nyheter

Stuora dáhpáhus Isogaisas:

Noaideheajat

Mannan lávvordaga lei vuosttaš háve ahte noaideheajat lágiduvvo Isogaisa. GOVVA: JON HENRIK LARSEN

LOABAT/FJELLKYSTEN: Lávvordaga besse festiválaguossit leahkit mielde earenoamáš dáhpáhusas dán jagaš Isogaisa-festiválas, go Sabina ja Tore noaideheajat ledje guovddážis.

Salangen-Nyheter
Nye Salangen-Nyheter AS

Publisert:

Annonse
Annonse

Stuoralávvu festiválas lei spagga dievva náittosbárra bearrašiin ja olbmáin, muhto maiddai earáin geat háliidedje leahkit mielde dán earenoamáš dáhpáhusas Isogaisas. Lei mágihkalaš dovdu dán bále go vurdiimet moarsi, ja irgi čuččodii lávus ja vuorddašii iežas ráhkasa seammás go rumbbut vel gullojedje duogážis.

Jearrat lobi

Son gii vihahii lei Eirik Myrhaug, ja maŋŋil go moarsi lei sajis de son álggahii jearrat máttarmáttuin lobi čađahit dán vihaheami. Son maid bovdii iešguđetlágan energiijaid boahtit ja náittosbárra oaččuiga buhtástusa ovdal go vihaheigga. – Buot stuorimus lea ráhkisvuohta, logai Eirik ja sárdnidii ráhkisvuođa rolla birra noaidemáilmmis.

Eirik Myrhaug bovdii energiijaid boahtit go Sabina ja Tore náitaleigga Isogaisas. GOVVA: JON HENRIK LARSEN

Gumpe ja goaskin

Lagamuš bearaš besse sávvat náittosbárrii lihkku ja cealkit sin buressivdnideami sudno ovddas, ovdal go náittosbárra logaiba iežaska lohpádusaid nuppi nubbái.  

– Mun lean du goaskin, ja boađan álo váruhit du, logai Tore iežas moarsái ovdal go Sabina lohpidii iežas irgái álo fáktet su dego gumpe. Loahpas náittosbárra lonohalaiga suorbmasiid ovdal go cummesteigga vuosttaš háve náittosdilis stuora iluin sidjiide geat ledje boahtán geahččat.

Sabina ja Tore áito náitalan. GOVVA: INA MIENNA-VIMME

-

Riekta munnuide

Maŋŋel vihaheami beasaimet neahttaaviissas humadit veaháš náittosbárain. – Dát lei dat rivttes vuohki munnuide náitalit, lohka eamit seammás go doallá isida gieđa. Náittosbárra maid muitalii ahte ieš álddis heajat bohtet leahkit earáláganat ja ahte mállásat mat guossohuvvot leat Cherokee mállásat, muhto ahte lea geavahuvvon bohccobiergu das ovttastahttit Tore sámi ruohttasiid Sabina Cherokee ruohttasiin.

– Lea dehálaš munnuide ahte lea čanus čađa heajaid, lohka Tore mojiin.

Siellaga-Ođđasat sávvet lihkku náittosbárrii.