Bohtosat eai áibbas gárvásat:
NSR njunnošis
NSR lea ožžon eanemus jienaid dán rádjai ja orro ahte Aili Keskitalo šaddá ođđa Sámedikki presideanta. GOVVA: WENCHE KANSTAD
SÁPMI: Dán rádjai leat 59,4 proseanta jienastusat lohkkon Sámedikki válggas. Nu movt dál lea de lea NSR ožžon stuorimus oasi jienain ja orro leamen ahte sii ožžot iežaset presideanta evttohusa saddjái.
Publisert: 11.09.2013 kl 00:00
Sámedikki jienastuslogut eai leat vel áibbas gárvásat go measta 60 proseanta jienain leat lohkkon. Sámediggi čállá iežas neahttasiiddus ahte loahpalaš boađus boahtá loahpas vahkkus. Jienastuslihpput lohkkojit guktii, álggos dušše gaskkaboddosaččat ja de loahpalaš lohkkan. Go leat nu unnán jienastusat Sámedikki válgi de sáhttiba dát guokte lohkama addit guovttelágan bohtosiid ja sáhttá maid rievdat.
Skovis oainnat movt mandáhtat leat juohkásan dán rádjai Sámedikki válggas.
Viestarmera válgabiire
Válgabiras masa dát guovlu gullá lea Viestarmera válgabiire. NSR ja Bargiidbellodat leaba ožžon áirasiid Sámediggái, nu go skovvi čájeha. Dán válgabirrasis leat ollislaččat 1.569 olbmo geat besset jienastit, muhto lea dušše 848 geat leat geavahan iežas rievtti jienastit. Dát mearkkaša ahte lea dušše badjelaš bealli geat leat jienastan, 54 %.
Ii vel gárvvis
Leat ain jienat mat galget lohkkot ja dát sáhttet rievdadit bohtosiid mat dál leat garvásat. Ollislaš govva Sámedikkis sáhttá rievdat ja ii leat vel čielggas gii šaddá ođđa presideanta, muhto nu movt dál lea de orro leamen ahte lea Aili Keskitalo gii oažžu dan barggu.
