1877as álggahii Ludwig Markus Mack  vuoššanfabrihka Romsii, fabrihka mii galggai vuoššat vuola. Son lihkostuvai ja Mack-vuola lea dál Davvi-Norgga vuola mas leat oasažat riikaoasis iežas smáhkas. 2012is sirddi Mack iežas vuoššanfabrihka Gárganii Romssas ja Siellaga-Ođđasat besse mannan vahkkus siskkobeallai uvssaid geahččat makkár doppe lea. Fabrihkkahoavda Roe Jenset válddi vuosttá min ja čájehii ja muitalii iežas ođđa bargosaji birra mii lea 18.000 kvm stuoris.

Olu vuola

- Dá lea min máilbmi ja dá oainnat visot daid táŋkkaid gos vuola ráhkaduvvo, muitala Jenset áŋgirit. Son čilge, vázzá viidáset, čujuha ja čilge ja vázzá vel eambbo, go fabrihka lea stuoris nu ahte ferte beare čuovvut ofelačča vai ii lahppo vuolabohttaliid sisa. Mack ii rahkat šat dušše vuolaid, muhto eará juhkosiid maid. Ieš Mack-vuola gávdno iešguđetlágán hámis ja smáhkain ja dál sii áigot almmuhit vel ovtta vuola.

Sevdnjes áigi

Ođđa vuola lea ožžon nama Nordlys, dahje Guovssahas ja almmuhuvvo 1.beaivvi čakčamánus. Lea maiddai Guovssahas mii lea buktán inspirašuvnna dan ođđa vuola smáhkkii ja ii dušše námmi.  Jenset čájeha boksa masa dat ođđa vuola galgá devdojuvvot.  Doavdnji lea ráhkaduvvon Tank Design fitnodagas ja govva mii lea boksas ja lásebohttaliin lea govvejeaddji Rune Stoltz Berinussen váldán. – Ii oktage mis bargiin leat vel máistán dan ođđa vuola, dušše son gii lea vuoššanmeašttir. Nu ahte mii leat lihka áŋgirat beassat máistit go earát, mojohallá Jenset.