Salangen-Nyheter

Violet Road čuojahedje stuora iluin:

Olbmot lávlo mielde

Violet Roadas orrui hui somá lavdi alde go viimmat fas ledje Vuotnasiiddas čuojaheamen. GOVVA: INA MIENNA-VIMME

VUOTNASIIDA: Badjel 3000 olbmo ledje boahtán guldalit Violet Road čuojahit Vuotnasiiddas lávvordaga eahkeda ja sii viđas geat leat joavkus duođaid ožžo olbmuid mielde. Stuora iluin sii lávlo ja čuojahedje lávlagiid masa olbmot sihke lávlo ja dánso.

Salangen-Nyheter
Nye Salangen-Nyheter AS

Publisert:

Annonse
Annonse

Ii lean vuosttaš háve ahte Violet Road čuojahedje Vuotnasiiddas ja orui ahte sihke sii ja guldaleaddjit ledje vuordan ja illudan dasa sii galge fas boahtit čuojahit. – Mii leat Violet Road ja mii leat vuordan ja vuordan dasa dát beaivi galggai boahtit ja dál lea viimmat das, logai Halvard Rundberg ovdal go sii álggahedje vuosttaš lávlaga stuora ávvun guldaleddjiide.

Nubbi joavku

Konseartaeahket álggahuvvui Siellaga Musihkkariid searvin ja sin Beatles-čájálmasain, geat loahpahedje pyroshowain ja stuora bávkkanasain. Ii lean ge guhka maŋŋel ahte Romsa-joavku Violet Road bohte lavdde ala ja ráhkadedje eallima márkanis. Joavkus leat Rundberg-vieljažagat Håkon, Hogne, Halvard ja Herman geat leat Gáivuonas eret ja maiddai Kjetil Holmstad-Solberg gii lea ges Ánddasullos eret.

Guldaleaddjit lávlo mielde ja navddašedje musihka maid Violet Road čuojahedje.GOVVA: INA MIENNA-VIMME

Máŋga oahpes lávlagat

Joavku čuojahedje máŋga sin oahpes lávlagiid muhto maiddai lávlagiid sin ođđa skearrus Peter Every and His Marching Band. Guldaleaddjit lávlu mielde go joavku ovdanbukte lávlagiid nugo Can You Hear the Morning Singing ja Last Days in India. Sii ferteje boahtit lavdi ala ja ovdanbuktit vel guokte lávlagiid go olbmot huike ahte háliidedje eambbo. Loahpalaččat sii lávlo Å Eg Veit Meg Eit Land ovttas guldaleddjiin ovdal go sii giite sin ovddas ja Top Coat válde badjelasas lávddi ja jotke konsearttain gitta lohppii.